Bann zanfan maternel Les Mirabelles Grand Bay inn fer sesion lor sexialite kot bann zanfan inn montre komien zot kapav ek zot inn memoralize. Bann zanfan inn bien partisipe ek inn bien kontan.
Dan sa sesion-la, mo pa’nn servi okenn desin. Alor, pou koumanse mo’nn fer enn konversasion. Mo’nn demann bann zanfan ‘eski tifi ek garson zot parti prive parey?’ Mo gagn repons ‘non li pa parey’ ek ena zanfan ti pe desine dan ler avek zot ledwa apre zot dir ‘mis gete pou garson li koumsa ek pou tifi li koumsa’. Asterla, mo demande ‘be kouma gagn enn ti bebe dan vant enn madam?’ ek la mo gagn repons ‘Avan bizin marye lerla kapav gagn ti bebe’ ‘mis mama papa bizin zwenn lerla kapav gagn ti bebe dan mama so vant’, ‘papa ti ed mama pou kapav met ti bebe dan so vant’, ‘zis bann madam ti kapav gagn ti bebe dan so vant’.
Mo mem mo’nn extra kontan pou gagn sa bann repons-la. Mo’nn satisfe avek mo travay parski asterla mo nepli gagn repons ‘par mazik ki gagn ti bebe’, ‘bondie ki donn ti bebe’. Parlaswit, mo deman bann zanfan, ‘be eski asterla, si zot anvi la, eski zot kapav ena enn ti bebe dan zot vant?’ mo gagn repons ‘non, la nou ankor tiptila’, ‘avan nou bizin vinn gran, nou pou travay, lerla nou marye lerla ki nou kapav gagn ti bebe’.
Asterla mo prosenn kestion ti kouma ti bebe sorti depi dan vant. La ‘si mo’nn extra kontan. Bann zanfan dir mwa ‘madam-la so parti prive ouver lerla ti bebe-la sorti enn tigit lerla dokter trap li tir li’ ek la mo’nn gagn enn repons depi enn garson kot li dir mwa ‘mis be mo mama inn dir mwa dokter ti koup so vant pou tir mwa’. Lerla mo’nn explik bann zanfan ki kan madam-la so parti prive pa ouver li gagn difikilte pou ouver, lerla dokter koup enn ti bout madam-la so vant lerla li tir bebe la, apre li re koud li. Be sa dan gran lekol ki zot pou aprann li. Bann zanfan ti pe ekoute avek foul konsantrasion, zot ti trankil. Zot inn montre ki zot interese pou konn lor sa size-la afon.