Bred Mouroom.le 27 novam bann zanfan atelie de savwar ti fer formasion FAREI
Moringa enn plant ki nou pli kone kouma bred mouroum e so lorizinn, li enn plant sorti an Tamil Nadoo kot apel li (murungai) – drumstick.
Malgre gro lapli bann Youth Girl ek Rebecca inn resi fer sa zoli dekouvert lor sa plant ki ena enn grand plas dan lakour par derier pou la plipar dimoun. Se enn bann plant ki ena pli bokou valer nitritif dan lemond. Li enn plant ki ena gro itilite kouma plant medisinal, swin pou seve, tretman pou lestoma (indizestion). Li ousi ede pou kontrol nou pwa, protez nou lefwa, eklersi nou vizion, servi kouma enn antibakteri, tret anemi ek lasm ek pli zoli travay ki li fer se retourn ou lazwa ki ounn perdi, donn ou enn mood zovial. Nou servi tou parti dan moringa. Par exanp so lagrin pirifie delo ek osi servi dan diferan tip repa kouma gratin baton mouroom. So lagrin, nou griy li, mem so fey nou aroz lor bann meni fini prepare parey kouma kotomili.
Nou osi kapav kraz fey moringa an poud pou bwar kouma dite (herbal tea), zi. Seki nouvo ki nou’nn aprann, seki servi li dan patisri pou gagn zoli kouler dan snak tousala. Li an diferan form kouma sorbe – piksidou. Sa plant la li kapav reziste lasesres, kapav ranplas panadol ek osi so rasinn li anrisi later, savedir anpes later lave. Nou servi pie la kouma baraz ek ansam ar li bann plant filant pous bien. Finalman li enn plant ki tou dimounn kapav konsome kouma bizen.
Ti enn sesion bien anrisisan kot nou finn gout enn reset ki apel pesto (satini moringa) avek enn ti biskwi. Bann tifi inn bien kontan ek inn apresie sa zoli partaz ki FAREI inn donn nou la. Li enn sesion ki amenn bokou lide inovation pou lane prosenn pou nou bann reset.

Rebecca Perianen
24 Novam 2018