Nou ti fer nou premie sorti pedagozik pou lane 2017 dan mwa fevriye akot nou ti al laplaz Palmeraie. Preske tou zanfan ti prezan sa zour la. Gro soley dan lesiel, linz lamer dan sak, manze dan bol, delo ek zi dan boutey, kontanteman zanfan ek bann staff, nou inn kit gardri 9er direksion laplaz. Rebecca, Nathalie ek 3 paran volonter ki ti akonpayn nou ti responsab pou instalation dan kiosk. Zot finn aport nou enn gran led.

Ala bann aktivite ki bann zanfan finn fer pandan sa lazourne la : zwe dan disab, rod koki, zwe dan delo ek serso. Bann zanfan finn bien kontan moman dezene akot zot tou ti asize anba lor nat anba pie filao.

Nou finn pas enn bon moman ensam avek bann zanfan. Ti enn lazourne ansoleye dan leker sakenn dant nou, akot bann ti morisien finn profit zot laplaz disab fin ek zot zoli lamer ble.